من الأشهر اليوم؟

المصري اليوم
بعثت هنا يسري ابنة الفنان الراحل إبراهيم يسري، برسالة إلى والدها في ذكرى رحيله، عبر حسابها الشخصي على إنستجرام.
وقالت هنا عبر حسابها: «٤ سنين.. في نفس الوقت دة بالظبط من ٤ سنين صحيت على خبر غيرلي حياتي كلها.. ومن ساعتها والحياة عمرها مرجعت زي الاول ولا عمرها هترجع».
وأضافت هنا في رسالتها: «أنا بقالي اسبوع مراهنة نفسي اني مش هحط صور ولا اكتب حاجة ولا حتي افكر في الموضوع بس خسرت الرهان كالعادة. اااااااااه.. وحشتني اوي يا هيما.. اوي.. اووووي.. الحياة من غيرك صعبة! صعبة اوي. عمري معرفت ولا فهمت معني الوحشة دي غير لما سبتني.. عمري مفهمت معني الابتسامة اللي فيها وجع غير بعدك».
وتابعت ابنة الفنان الراحل رسالتها إلى والدها قائلة: «وحشني ضحكتك الحلوة بزيادة، وحشني حضنك، وحشني حنيتك عليا، وحشني سؤالك عليا ودلعك ليا، وحشني حسك في البيت، وحشني اني اروح و ادخل عليك و اتكلم معاك.. وحشني صوتك.. ساعات بكون ماشية في مكان كنا بنروحه كتير مع بعض، او اشم ريحتك في مكان فجأة، فجأة بحس ان قلبي اتعصر».
وتحكي هنا عن حلم يتكرر دائما في منامنها، قائلة: «من كام يوم حلمت بيك نفس الحلم اللي بحلمه علي طول، انك بتقولي انا لسة موجود يا نونو، بس المرة دي الحلم كان حقيقي بزيااادة لدرجة اني صحيت ببص حواليا عشان افتكرت انك موجود بجد.. انا مابقتش انا من ساعة ما سبتني يا بابي.. الوجع هدني.. وكبرني..الـ ٣ سنين اللي فاتوا مكنتش عارفة ولا قادرة ارجع لحياتي اللي حرفيا وقفت من بعدك.. مؤخرا بس بدأت اكون احسن.. عارف ليه؟ عشان شايفاك و انت بتقولي (انتي عبيطة يا نونو؟ بتعيطي ليه يا حبيبتي) فا كل ما آجي اعيط، افتكرك واضحك وابطل عياط عشان والله العظيم انت لسة معايا.. انا كل ما بفرح او يحصل حاجة جديدة في حياتي، بجري عليك احكيلك.. كل لحظة انت في بالي و لسة بشارك معاك كل حاجة، ويمكن اكتر كمان».
وتختتم هنا يسري رسالتها بـ «اللي مصبرني حب الناس الزيادة، ما شاء الله ليك يا بابي. انا في ناس بتحبني من غير ما يعرفوني لمجرد ان انا بنتك.. والله كمية الكلام الحلو اللي بيتقال عليك وكمية حب الناس ليك مش عادي.. من جوة ومن برة الوسط.. يارب تبقي عارف وحاسس.. كل يوم بعرف عنك حكايات تخليني فخورة اكتر واكتر اني بنتك انت مش بنت اي حد تاني.. انا رأسي مرفوعة بسببك لفوق اوي يا بابي.. اشوفك علي خير يا حبيب قلبي ونور عيني».